Шинэ Мэдээ
2024 оны 2 сарын 2-ны өдөр Бэй Аэриагийн Монголын бизнес консулаас Сан Франциско хот хотноо зохион байгуулсан Дефакто Жаргалсайханы уулзалтанд БАМХ-гоо төлөөлж, УЗГ Ш.Баатар, УЗГ Ю.Ариунзаяат нар оролцож, бүтээлүүдийг худалн авч дэмжив. Монголын өнөөгийн зорилтууд ба шийдлүүд сэдвээр Дефакто Жаргалсайхан гуай тун сонирхолтой лекц уншиж, халуун дотноор ярилцав.
БАМХ
БАМХ технологийн компаниудын бөөгнөрөл болсон цахиурын хөндийд үйл ажиллагаагаа явуулдаг билээ. Газар нутгийн байрлалын хувьд цахиурын хөндий нь Сан Франциско хавийн хотуудаас урагшлаад Сан Хозе хот хүртэл хамардаг, технологийн ихэнх компани, хөрөнгө оруулагч нар ажилладаг онцлог газар билээ. Хүмүүс хаа холоос зорьж ирдэг газар бид сууж байгаагийн хувьд эндээ байгаа хүүхэд, залуусаа технологийн салбарт олноор оруулах болон монгол компаниудаа технологийн салбар луу орох зүтгэлд нь хүч хавсран дэмжсээр ирсэн билээ. Төв Азийн орнууд Америкийн технологийн салбарт амжилт гаргахын тулд хүчээ нэгтгэх нь зөв юм байна гэсэн гаргалгаагаар байгуулагдсан "Silkroad innovation hub"-д МУ-ын цахим хөгжлийн салбарынхан нэгдсэн тэмдэглэлт үйл явдлуудаар дүүрэн өдрүүдийн хүрээнд МУ-д болон цахиурын хөндийд ажиллаж байгаа технологийн салбарын монголчууд уулзан танилцаж, хүрээгээ тэлж, ажлаа холбон уялдуулсан олон уулзалт, арга хэмжээ болж байна. БАМХ "Silkroad innovation hub"-ийн үйл ажиллагаанд цаашид дэмжлэг үзүүлэн хамтран ажиллахаар ярилцан тохирлоо.
БАМХ
2023 оны 8 сарын 5-нд шинээр ирсэн Ерөнхий консул Б.Мөнхбаатар болон консул П.Баярмагнай, дэд консул Хонгорзул нар БАМХ-ны удирдах зөвлөлийн төлөөллийг албан ёсоор хүлээн авч уулзаад, хамтран хийх ажлынхаа төлөвлөгөөг ярилцав. Бусад ашгийн бус байгууллагуудаа удахгүй хүлээн авч уулзах болно.
Бэй Аэриагийн Монголчууд маань эх орондоо цаг ямагт тусалсаар ирсэн билээ. Бид урд нь түймэр, зуд, эмнэлэг, бусад буяны ажлуудад зориулсан хандивын аян өрнүүлж, элэг нэгтэндээ туслах гэсэн Бэй Аэриагийнхаа монголчууд болон тусламж хэрэгтэй болсон хүмүүсийнхээ дунд гүүр болон ажиллажээ. Энэ удаа ч мөн Баянзүрх дүүрэгт болсон осол, дэлбэрэлтэд өртөж хохирсон хүмүүс, ажил үүргээ гүйцэтгэж яваад амиа өргөсөн ажилтнуудын ар гэрт жаахан ч атугай хувь нэмэр болъё гэж шийдлээ. Хэдийгээр асуудлыг хандиваар шийдвэрлэх ёсгүй, боломжгүй ч хандивыг цуглуулаад нэрвэгдсэн хүмүүсийн гарт шууд хүргэвэл бага ч гэсэн сэтгэлийн дэм болох болов уу гэж бодож байна. Та бүхэн дэмжээрэй. Бид Улаанбаатарт байгаа төлөөлөгчөөрөө дамжуулан тусламжийг урдын адил найдвартайгаар хүргээд эргэн мэдээлэх болно. Баярлалаа.
2023 оны 11-р сарын 18-нд Сан Франциско хот дахь Ерөнхий консулын газарт болсон эцэг эхчүүдийн уулзалтын үеэр Сан Франциско хотын сургуулиудын захиргаанд мэргэжилтнээр ажиллаж буй Жанцанхорлоо маань Америкийн болон тэр дундаа Калифорнийн бага, дунд, ахлах сургуулиудын төсөв, ирц бүрдэлт, багш нар, эцэг эхчүүдийн үүрэг, юун дээр илүү анхаарах гэх мэтээр ээж аав нарт маш үнэтэй зөвлөгөө өгсөн.
-- Хэлний бэрхшээл, цагаачлалын статус харгалзалгүй хүүхдийнхээ сургуульд асуудлаа танилцуулдаг байх
-- Сургуульд эцэг эхийн оролцоо өндөр байдаг болохоор хүүхдээ сургуульд зөвхөн даатгалгүй, эцэг эхчүүдийн үйл ажиллагаанд идэвхтэй оролцдог байх
Өөр олон хэрэгтэй зөвлөгөө өгсөн Жанцанхорлоогийн илтгэлийн материалыг авах хүсэлтэй бол имэйл хаягаа консул, эсвэл холбооны мэссэнжэрээр илгээж болно.
Уулзалтыг санаачлан зохион байгуулсан ЕКГ-т болон олон үнэтэй мэдээлэл өгсөн Жанцанхорлоодоо талархлаа илэрхийлье.
БАМХ
БОЛОВСРОЛЫН АСУУДЛААР САНАЛ СОЛИЛЦОХ УУЛЗАЛТ БОЛОВ
Монгол Улсаас АНУ-ын Сан Франциско хотод суугаа Ерөнхий консулын газар, Бэй Аэриа дахь Монголчуудын Холбоотой хамтран Сан Франциско Бэй Аэриа дүүргийн Ерөнхий боловсролын сургуульд суралцаж байгаа монгол хүүхдүүдийн боловсролын асуудлаар санал солилцох уулзалтыг 2023 оны 11 сарын 18-ны өдөр тус ЕКГ-т зохион байгуулав.
Ерөнхий консул Б.Мөнхбаатар уулзалтын эхэнд хүүхдийнхээ боловсролд санаа тавьж, амралтын өдөр цаг гарган ирсэн бага, дунд, ахлах сургуульд суралцаж буй 20 гаруй сурагчдын эцэг эхэд талархал илэрхийлж, тус ЕКГ-ын үйл ажиллагааг товч танилцуулав.
Уулзалтад Сан Франциско хотын Боловсролын газрын Бодлого төлөвлөлтийн ахлах мэргэжилтэн Д.Жанцанхорол оролцож, тус дүүргийн боловсролын тогтолцооны талаар дэлгэрэнгүй мэдээлэл өгч, эцэг эхчүүдийн сонирхсон асуултад хариулав.
Сан Франциско хотын сургуулиудын нэгдсэн дүүрэг нь Калифорн мужид 1851 онд байгуулагдсан, тус мужийн долоо дахь том сургуулийн дүүрэг юм. Тус дүүргийн 126 сургуульд 50 мянган сурагч суралцаж байна.
