Урлагийн олон талын авьяастай Агиймаа охиноор, охиндоо цаг зав, сэтгэл зүрхээ зориулж, байнга дэмждэг аав ээж, гэр бүлээр нь үнэхээр бахархаж байна. Бэй Аэриагийн монголчуудын 2018 оны "Урлагийн шилдэг"-ээр шалгарсан Д.Агиймаа соёл урлагийн олон арга хэмжээнд оролцож, авьяас билгээ хөгжүүлж, завгүй хөдөлмөрлөж явна. Өөрийгөө бүрэн дайчилж байгаа хүнийг амжилт дагах нь зүй билээ.
Саяхан Малайз улсад болсон "Super kiddos International Search", "Luxury brand model awards" тэмцээнд Монгол улсаа төлөөлөн оролцож, олон орны багачуудаас авьяас билгээрээ шалгаран манлайлж, тэргүүн байрыг эзлэн гурван шагнал, цомын эзэн болжээ.
Агиймаа Бэй Аэриагийн хүүхдүүдийг төлөөлж, Үндэсний телевизийн "Үлмэдэх Америк орноор" нэвтрүүлгийн зочноор оролцож, хэвлүүхэн ухаалаг яриа, гаргасан амжилт бүтээлээрээ үзэгч олны хайрыг татаад амжсан.
"Гэр төв", "Би монгол" сургуулийн анхны сурагчдын нэг Д.Агиймаа БАМХ-ны дэргэд төгөлдөр хуурын дугуйлан нээгдэхэд бас л хамгийн анхны шавь нарын нэг болж байсан. "Азийн модель" агентлагийн Содтуяа багш нь Бэй Аэриагийн хүүхдүүдэд гоозүйн хичээл зааж эхлэхэд мөн л хамгийн түрүүнд бүртгүүлж байсан. Сүүлийн жилүүдэд Бэй Ариа орчимд болж байгаа соёл урлагийн бүхий л арга хэмжээнд ая дуу, уран бүжиг, төгөлдөр хуур, хувцас загварын үзүүлбэр гээд төрөл болгоноор манлайлан оролцож байна. Эдний гэр бүл охиноо дэмжиж, зөв сайхан өсгөн хүмүүжүүлэхийн зэрэгцээ монголынхоо соёл урлагт ямар их хүндэтгэлтэй ханддаг, монголчуудынхаа үүсгэл санаачлагыг хэрхэн байнга дэмжиж байдгийг энэ бүхнээс харж болно.
Энд хүүхдүүдийг сайхан дэмжээд өв тэгш өсгөн хүмүүжүүлэх боломж бүрэн бий. Хэдий гадаадад ч гэлээ яруу монгол хэлтэй, монгол соёлтой, сэтгэхүйтэй, сэтгэлтэй монгол хүнийг өсгөх боломж бий. Арав гаруйхан настай ч олон сайхныг хийж бүтээж, хөдөлмөрлөж яваа охины жишээ үүнийг харуулж байна.
Агиймаа минь, өндөр болж, бүр өндөрт мандаарай. Монголын соёл урлагт өвөө шигээ гялалзаарай. Амжилтын дээдийг ерөөе.
БАМХ
